Ciidamadii ka tirsanaa Daraawiishta Jubbaland ee isku dhiibay ciidamada dowladda federaalka ayaa maanta lagu wadaa in loo soo qaado magaalada Muqdisho

 Dowladda Federaalka Soomaaliya ayaa maanta lagu wadaa inay magaalada Muqdisho keento ku dhowaad 100 askari oo hore uga tirsanaa Daraawiishta Jubbaland, kuwaas oo shalay isku dhiibay ciidamada Xoogga Dalka ee ku sugnaa aagga deegaanka Raaskambooni ee gobolka Jubbada Hoose.

Sida wararka qaar sheegayaan, dowladda ayaa diyaarad u dirtay askartan si loogu soo wareejiyo Muqdisho, halkaas oo la filayo in soo dhoweyn rasmi ah loogu sameeyo.

Xog rasmi ah ayaa tilmaamaysa in askartan la siin doono abaal-marinno, xuquuqda askarinimada, mushaaraad, iyo dalacsiin si ay uga mid noqdaan ciidamada Xoogga Dalka Soomaaliyeed.

Dowladda federaalka ayaa sidoo kale ku boorrisay ciidamada kale ee Jubbaland inay ka soo baxaan goobaha ay ku sugan yihiin, isla markaana isku soo dhiibaan dowladdooda, si ay uga mid noqdaan ciidamada qaranka.

Saraakiisha hoggaamineysa ciidamadii Jubbaland ee isku dhiibay dowladda ayaa sheegay in laga soo diray Kismaayo iyo deegaano kale oo ay ku sugnaayeen, iyagoo wata amar lagu farayo inay ka hortagaan duulaanka ay wadaan ciidamada Xoogga Dalka.

Si kastaba ha ahaatee, saraakiishu waxay caddeeyeen in amarkaasi uu u muuqday mid aan macquul ahayn, maadaama aysan diyaar u ahayn dagaal ka dhan ah ciidamada qaranka. Taa bedelkeeda, waxay shaaciyeen inay diyaar u yihiin inay si buuxda ula shaqeeyaan ciidamada dowladda, si loo hirgeliyo amarka dowladeed loona adkeeyo nabadda iyo midnimada dalka